رواندا
رواندا رسميا لجمهورية د رواندا (بلينݣليزية: Republic of Rwanda - بلفرانساوية: République du Rwanda - بلكينيارواندا: Repubulika y'u Rwanda - بالسواحيلي: Jamhuri ya Rwanda) هي بلاد ماكاطلش على لبحر جات ف الشرق د إفريقيا. تاتحدّها طنزانيا من الشرق، أوݣاندا من الشمال، جمهورية لكونݣو ديموقراطية من لغرب، و بوروندي من لجنوب. رواندا بلاد طالعة فلإرتفاع، و تاتسمّا ب "لبلاد ديال ألف هضبة".[1] رواندا معروفة تا باللي فيها الضايات بزاف، و هي وحدا من لبلايص اللي تينبع فيها لواد د النيل.
رواندا معروفة ف لعالم بلمجزرة لكبيرة اللي وقعات فيها ف 1994، ما بين لقبايل د لهوتو و التوتسي، و اللي مات فيها كتر من مليون واحد. من مورا هاد لوقيتة لكحلة، تقادات شويا لأمور ف لبلاد، و دابا ولاّ عندها اقتصاد مزيان، و عندو أكبر نسبة د النمو ف إفريقيا (تيطلع ب 8% ف لعام[2]).
تيسكنو ف رواندا تقريبا 12.6 مليون د الناس و لعاصمة ديالها هي كيݣالي. لبلاد عندها ربعا د اللغات رسمية هوما لينݣليزية و لفرانساوية و لكينيارواندا و السواحيلي. ف 2008، بدلات رواندا اللغة اللولا ديالها اللي كاتخدّم ف التعليم و لإدارة من لفرانساوية للينݣليزية.[3] لفلوس اللي كيتخدّمو ف لبلاد هوما لفرنك الرواندي. رواندا داخلة مع بزاف د لمنضمات دولية بحال لأمم لمتحدة و لإتحاد لإفريقي و لكومونويلث (واخا ماعمرها ما كانت مستعمرة ديال بريطانيا).
- ↑ "دولة رواندا من الإبادة الجماعية إلى الريادة المثالية - مركز المستقبل للدراسات الإستراتيجية (2019)". Archived from the original on 2023-05-16. Retrieved 2021-03-17.
- ↑ "رواندا المعجزة - الجزيرة (2016)". Archived from the original on 2022-03-21. Retrieved 2021-03-17.
- ↑ "هذه رواندا - وفعلتها - جزايرس (2008)". Archived from the original on 2022-10-22. Retrieved 2021-03-17.
 | ويكيميديا كومنز عندا تصاور و معلومات على رواندا. |
 هادي زريعة ديال مقالة خاصها تّوسع. تقدر تشارك ف لكتبة ديالها. |
